काठमाण्डु, ४ असार– नेपाली सेनाले भूकम्प पीडितहरुका लागि ११ जिल्लामा ३६ वटा सामुहिक आवास गृह निर्माण गरेको छ । सेनाले ती अति प्रभावित जिल्लाका ३६ सामुहिक आवास गृहले करिब ४ सय ६८ परिवारले राहात पाउँदैछन् ।
सरकारले सेनाले निर्माण गरेका ती आवास गृह आउँदो असार १० गते पीडितहरुलाई हस्तान्तरण गर्दैछ । सरकारले दिएको निर्देशन बमोजिम सेनाले ती आवास गृह निर्माण कार्य सम्पन्न गरेको हो ।
अनौठो त के छ भने नेपाली सेनाले बीस दिनमै ती स्थानमा सामुहिक आवास गृहहरु निर्माण गर्न सफल भएको छ । सरकारले नेपाली सेनालाई सामुहिक आवास गृह निर्माण गर्न जेठ २० गते आधिकारिक रुपमा निर्देशन दिएपछि सो अभियान सुरु भएको थियो ।
सरकारको समन्वयमा आवास गृह निर्माण गरेको बताउँदै आएको नेपाली सेनाले आगामी दिनमा पनि भूकम्प पीडितहरुका लागि यो अभियान जारी नै राख्ने बताएको छ ।
प्रधानमन्त्री र प्रधानसेनापतिले संयुक्त रुपमा हस्तान्तरण गर्ने
नेपाली सेनाले निर्माण गरेका ती सामुहिक आवासगृह प्रधानमन्त्री केपी ओली र नेपाली सेनाका प्रधानसेनापति राजेन्द्र क्षत्रीले सामुहिक रुपमा हस्तान्तरण गर्ने जनाइएको छ । असार १० गते एक कार्यक्रमका बीच ती आवास गृह हस्तान्तरण गर्ने कार्यक्रम रहेको नेपाली सेना निकट श्रोतले जनाएको छ । भूकम्पबाट अति प्रभावित दोलखा, सिन्धुपाल्चोक, गोरखा, नुवाकोट, धादिङ, रामेछाप, सिन्धुली, मकवानपुर, काभ्रे, ओखलढुंगा र रसुवाका पीडितहरुले ती आवास गृह पाउनेछन् । नेपाली सेनाले यो वर्षनै निकै धेरै काम गर्न सकिने र वर्षाअगावै धेरै पीडितहरुले राहात पाउने सम्भावना भएको भएतापनि सरकारको नीति, निर्देशन र अन्य प्रक्रियाहरुका कारण ढिलाई भएका कारण सिमित काम गर्न सकिएको जनाइएको छ ।
प्रधानमन्त्री ओलीलाई नेपाली सेनाले बीस दिनमै काम गरेर देखाइदियो
